Harmoni ndërfetare në fshatin Kamenicë, një banor dhe fqinjët e tij rindërtojnë kishëzën ‘Fjetja e Hyjlindëses Mari’.
Një harmoni e lavdërueshme ndërfetare dëshmohet nga banorët e fshatit Kamenicë, të cilët janë edhe të besimit ortodoks edhe atij mysliman. Këtu egziston një xhami dhe tre kisha, ndërsa është në ndërtim kishëza e katërt.
Një prej banorëve i quajtur Mario dhe fqinjët e tij janë inisiatorë për të rindërtuar kishën “Fjetja e Hyjlindëses Mari”.
Atë Ilia Kotnani ka sqaruar se Mario 25 vjet më parë mbolli dy qeparisa në kishën e fshatit. Aktualisht ai po rindërton kishën në fshatin e tij me ndihmën e banorëve të tjerë dhe përkujdesjen e priftit të enorisë Atë Ilia Kotnani.
‘Kamenica është një fshat me bashkëjetesë ndërfetare të shkëlqyer’ shprehet Atë Ilia Kotnani, duke sjellë si shëmbull ndër të tjera edhe martesat e të rinjve nga të dy besimet fetare.
Ndërtimi i kishëzës ka kontributin e komunitetit, pasi është dhuruar edhe tokë për rrugëkalimin drejt objektit të kultit, si dhe krijimin e një shesh pushimi për besimtarët.
Historia e veçantë ndodh në komunitetin e Kamenicës, 11 km në jug të qytetit të Korçës, ku banorët, pa dallim fetar, kontribuojnë edhe për mirëmbajtjen e kishave të tjera të fshatit të tyre.
Shkruar nga Gëzim Hashimi
