Edhe pse në fund të vitit shkollor, mësuesit e gjimnazit “Bardhyl Pojani”, në Pojan i japin rëndësi orës së orientimit për karrierën.
Sot kanë zhvilluar mësim të hapur dhe kanë pasur në qendër të mësimit historitë e dy ish-nxënësve të shkollës “Bardhyl Pojani”.
Historia e suksesit e Jurgen Tahirit dhe Florjan Meçollit, të dy 24 vjeçarë dhe banues në fshatin Shëngjergj është për t’u marrë shembull frymëzimi për çdo të ri.
Ata ju folën nxënësve dhe ju treguan gjithçka nga afër duke ju dhënë mesazhin se toka është e florinjtë.
“Vendi dhe toka shqiptare është e bekuar. Vetëm pak më tepër dashuri ndaj punëd dhe gjithçka është e mundur në këtë vend”- u shprehën ata.
Largimi i të rinjëve është një problem shqetësues në vendin tonë, por kush ka dëshirë për të punuar dhe për të gjetur të ardhura e gjen një mundësi. Shqipëria ka elementë shumë të mirë për t’u shfrytëzuar.
Jurgeni dhe Floriani kanë mobilizuar energjitë e tyre për krijimin e një biznesi sa të bukur aq edhe fitimprurës, atë të kultivimit të bimëve medicinale si, mëllaga e bardhë, radhiqja dhe hithra.
Nga një iniciativë e vogël ajo sot është shtrirë në sipërfaqe më të mëdha toke duke ju dhënë fitime kolosale familjeve të tyre.
Ata sot furnizojnë me lëndë të parë për bazën e prodhimit të medikamenteve mjekësore në shumë tregje botërore.
