Kthim në origjinë
Kristin Savage, Georgia Murphy dhe Paula Lazar jetojne në Boston të Shteteve të Bashkuara të Amerikës, aty ku kanë lindur dhe janë rritur.
Të treja se bashku me pjesëtarë të tjerë të familjes rrënjët i kanë nga Stratobërdha, një fshat i largët i Vithkuqit të Korçës.
Gjyshi i tyre ka emigruar në SHBA rreth viteve 1930 , aty ku është martuar e ka krijuar familjen e vet.
3 mbesat në një moshë të tillë por duke marrë me vete edhe të tjerë të kësaj familje kanë ardhur në Korçë për të parë qytetin por dhe fshatin ku lindi gjyshi i tyre.
“Unë jetoj ne Boston. Gjyshërit e mi kanë lindur të gjithë këtu në Korçë. Gjithë jetën time kam dëgjuar gjyshërit të flisnin për traditën shqiptare, ata flisnin me dashuri për Shqipërinë. Nuk di shumë në fakt për Shqipërinë por e di që erdhën në Amerikë për të punuar. Gjysherit ishin nga Treska Stratoberdha. Erdha për herë të parë dhe mund ta quaj shtepia ime. Qyteti shumë i bukur” – u shpreh Kristin Savage.
“Shumë emocionale, prekëse të jesh këtu. Ambientet këtu, njerëzit kaq të dashur, u mbushem shpirtërisht. Marr frymë lirisht këtu. Kisha dëgjuar për Korçën, mami na tregonte se prindërit e saj ishin nga Korça, ishin nga fshati i Treskës dhe mami fliste kaq ëmbël për ju. Ishte një lloj amaneti të vinim këtu, jemi rritur duke ngrënë ushqim shqiptar, duke dëgjuar muzikë shqiptare. Do marrim disa gjëra nga Korça dhe do i vendosim në varret e tyre në Amerike ” – tha Georgia Murphy.
“Korça është qyteti më i bukur në Shqipëri, rrugët, pazari, malet. Ishte një dëshirë sepse doja të shikoja ku gjyshërit e mi ishin rritur, rrënjet tona burojnë nga ky vend. Gjysherit na flisnin pothuajse çdo ditë për Shqipërinë, babi na fliste për traditat. Unë jam e prekur që po shikoj Shqipërine dhe shqiptarët. ”
Pasi kanë parë Korçën, Pogradecin dhe fshatrat turistike të juglindjes janë nisur për të vizituar qytete të tjera të vendit, mbi të gjitha Stratobërdhën e gjyshit të tyre.
