Klisman Cake, mbrojtësi qendror nga Pogradeci, është sot një nga figurat më të rëndësishme në prapavijën e Shkëndijës së Tetovës. Por rrugëtimi i tij deri këtu nuk ka qenë aspak i lehtë. I promovuar nga Tirana në sezonin 2018/19, ai nuk arriti të imponohej në një ambient toksik dhe konkurrencë të lartë, duke u larguar me vetëm 184 minuta të luajtura në kampionat.
Duke parë mungesën e hapësirave, 26-vjeçari mori një vendim të guximshëm: u transferua në Maqedoni te Struga, ku gjeti ritmin dhe zhvillimin që i mungonte. Aty nisi ngritja e tij e vërtetë, që kulmoi me kalimin te Shkëndija, një klub me pretendime dhe nivel të lartë në rajon.
Sot, kush e sheh Caken në fushë, sheh një mbrojtës modern: i fortë në duele, i pozicionuar saktë dhe me një qetësi të admirueshme me topin në këmbë. Ai është kthyer në një veteran të mbrojtjes kuqezi, një pikë referimi për shokët e skuadrës dhe një shembull për futbollistët e rinj shqiptarë.
Ndonjëherë nuk mjafton talenti dhe nuk ka rëndësi ku luan – ajo që bën diferencën është besimi në vetvete dhe fakti që dikush të jep mundësinë. Klisman Cake është dëshmia më e qartë për këtë.
Sot, Shkëndija përballet me Qarabakun në Shkup në kuadër të ndeshjeve europiane, dhe pogradecari është gati të tregojë sërish se sa larg mund të të çojë puna dhe përkushtimi.
