Skënderbeu pas fitores në ndeshjen e 3 me Tiranën me rezultatin 3-1 është shpallur kampion kombëtar në volejbollin për femra, i dyti në tre vitet e fundit.
Edhe ndeshja e tretë e luajtur në Korçë ka filluar si e pak ditëve më parë në kryeqytet, pasi Tirana ka fituar setin e parë me rezultatin 17-25.
Më fitoren e këtij seti, kryeqytetaset kanë shpresuar në përmbysjen e ndeshjeve por korçaret e Orlando Kojës nuk ua kanë dhënë këtë mundësi pasi kanë fituar setin e dytë 25-19, setin e tretë 25-17 dhe setin e katërt 25-22 dhe krejt takimin 3-1.
Kayna Williams është shpallur lojtarja me e mire e finaleve, lojtare e cila nuk i ka fshehur emocionet pasi tek Skënderbeu i këtij sezoni është rikthyer në merkaton e dimrit.
“Erdha për të fituar. Ja dolëm. Patjetër që ka emocione të shpallesh lojtarja me e mire e finaleve. Fituam gjithçka. Ky ishte qëllimi. Ne jemi Skënderbeu”, – tha Williams.
Të emocionuara pas titullit të fituar kanë qënë gjithë lojtaret përfshi këtu kapitenen Elena Bego dhe shkodranen Sara Malaj.
Ky është titulli i parë kampion për Orlando Kojën ndërkohë që në dy sezonet e tij tek ky ekip ka fituar 7 trofe. Koja flet për projekt afatgjatë me Skënderbeun, gjë për të cilën flet edhe kryetari i bashkisë Sotiraq Filo.
Në ndeshjet finale Skënderbeu ka fituar me Tiranën në Korçë 3-0, në kryeqytet 1-3 dhe këtë të shtunë në juglindje me rezultatin 3-1.
