Një incident i pazakontë dhe i bujshëm është regjistruar mbrëmjen e kaluar në qytetin e Korçës, ku një 26-vjeçar, Kostandin Dramolli, ka goditur me gurë godinën e Bashkisë, duke thyer disa prej xhamave të saj. Ngjarja ka ndodhur në shenjë revolte kundër aksionit të qeverisë për lirimin e hapësirave publike, konkretisht pas shembjes së disa strukturave në lagjen nr. 14, ku ai jeton.
Dramolli, i cili njihet si ish-portier në futbollin shqiptar, ka transmetuar gjithçka “live” në rrjetet sociale. Në video ai dëgjohet duke ofenduar kryeministrin Edi Rama, ndërsa thotë: “Edi Rama, shiko si sulmohet bashkia” dhe “Ke bërë shumë gabim kur shkatërrove lagjen 14.”
Kostandin Dramolli ka pasur një karrierë sportive me ekipe të njohura si Skënderbeu – ku është shpallur kampion me ekipin U-19 – si dhe me Bylisin, Pogradecin, Pierikos në Greqi dhe së fundmi me Maliqin. Pas tërheqjes nga sporti, ai është përfshirë në muzikën “rap”, duke marrë emrin artistik “Çekiçi 14”, një pseudonim që e lidh ngushtë me zonën ku është rritur dhe me karakterin e tij sfidues.
