Si pak qytete në Shqipëri, Korça prej disa vitesh tashmë nuk vuan më trafikun tallava në qytet të furgonave dhe autobusëve që parkohen kudo apo edhe ecin nëpër rrugë për të mbledhur pasagjerë.
E mbani mend se si ishte situata tek zona e quajtur agjensia e furgonave?
Një katrahurë e vërtetë, furgona pa kriter, njerëz që thërrisnin: Edhe një se ikëm! Pojani gati! Maliqi gati, Tirana u mbush! E shumë thirrje të tjera, pa harruar këtu edhe kohën kur shoferat të merrni për krahu e të plasnin në furgon, nisemi për 5 minuta të thonin dhe më pas prisje 1 orë me gajretin se po niset tani e po niset pastaj.
Dikush do thotë, po mirë do i vinte Korçës kjo ditë. Po do vinte, por edhe në këtë drejtim Korça ka lënë shumë “shoqe” mbrapa.
Falë një investimi me standarde europiane nga Korsel shpk, Korça ka tashmë Terminalin e saj, ndër më modernit në Shqipëri. Tashmë nuk ke nevojë që me trasta në dorë të presësh furgonin që do të niset apo të qëndrosh tek trotuari, pasi bashkë me investimin është rregulluar edhe nisja e linjave në çdo drejtim.
Teksa ti pret të niset makina, mund të qëndrosh ulur për një kafe apo ushqim të shpejtë në ambientet e shërbimit dhe nuk ke nevojë të presësh jashtë apo në furgon. Tashmë edhe transporti urban ka “qytetari” në Korçë.
Por Terminali nuk shërben vetëm për këtë punë. Të gjithë kemi qenë dëshmitarë sesi ajo hapsirë e madhe moderne ka arritur të presë dhe përcjellë me qindra mijra vizitorë gjatë festës së birrës në Korçë.
Pra Korça nuk ka vetëm një terminal, por Korça ka një hapsirë multifunksionale dhe kjo duhet thënë, ti japim Çezarit çfarë i takon, falë investimit vizionar të bërë nga Korsel.
Dikush mund të thotë teksa lexon këto rreshta; Hajde furçë i keni bërë Korselit, por le ta thonë. Fundja është një “furçë” e cila na shërben të gjithëve, tashmë Korça nuk ka kaos, nuk ka furgona të vendosur mbi tortuar dhe nuk ka të bërtitura hajd se u mbushëm dhe kjo pranohet nga kushdo.
