Instituti i Studimeve Politike ka publikuar së fundmi raportin e monitorimit të Parlamentit shqiptar. Mes raportit të gjatë në lidhje me funksionimin e tij, ISP ka renditur edhe deputetët që kanë pasur efikasitet të lartë, të ulët, dhe aspak aktivitet në Kuvend.
Mes të tjerëve bie në sy edhe prania e dy deputetëve të Korçës, saktësisht Seladin Jakupllari i PD që përfaqëson Pogradecin dhe Ilir Topi i PS që përfaqëson Devollin.
Më keq në renditje dhe më gjumashi i cili merr edhe jo pak rrogë rezulton sipas monitorimit Seladin Jakupllari, duket se deputeti nuk ka qenë aktiv në sallë mbi problemet që ka Pogradeci, Mokra, apo edhe fshatrat e tjerë për të mos folur për fushën profesionale të z. Jakupllari që është shëndetësia. Me shumë gjasa gjumi i Bashës ka infektuar edhe Jakupllarin si mbështetës i zjarrtë i tij. Teksa në shumë raste qytetarët ishin ankuar se Jakupllari kish humbur kontaktet me ta, duket se ai i ka humbur edhe me sallën e Kuvendit. Një vlerësim i tillë ndaj tij në prag zgjedhjesh dihet që nuk i jep pikë rikandidimit të doktorit, i cili si duket pasi u konvertua në kryeqytetas humbi lidhjen me realitetin.
Edhe socialisti që festoi jo pak kur u fituar bashkia e Devollit, Ilir Topi duket se i ndali ora pas këtyre zgjedhjeve. Nuk e dimë nëse z. Topi bën takime me bazën apo elektoratin që e votoi në Devoll, por një gjë tashmë dihet që në parlament ka pasur efikasitet të ulët, dhe për këtë ka zënë vend nderi në listën e monitorimit të ISP.
Fitorja e bashkisë nga PS duket se e ka rehatuar z. Topi në karrike, i cili nuk është se është interesuar për problemet e fermerëve në Devoll, për dëmshpërblimet e mollëve, grurit apo mungesën e tregut, aq sa edhe në parlament nuk i ka artikuluar ndonjëherë, fatkeqsisht.
Pra teksa së shpejti nisin ethet emërore të listave për deputetë, z. Topi pa efikasitet dhe z. Jakupllari “gjumash” do të duhet të zgjohen dhe të japin çtë mundin nga vetja, fundja nuk është pak edhe 4 vite të tjera në një karrike të butë dhe me rroga e dieta të majme në fund muaji.
