18-vjeçari kërkoi të mbetet anonim nga frika e paragjykimeve të vazhdueshme në qytetin ku jeton.
Fillimisht ai foli për orientimin e tij seksual duke thënë se e ka zbuluar në moshën 9 ose 10 vjeç dhe tërheqja e tij për të njëjtën gjini, është një fakt i njohur vetëm për një nga miqtë e tij, por jo për familjen apo grupin e miqve.
I pyetur nga Kolibri.al në lidhje me jetën e tij të përditshme, i riu pranoi se ngacmohet çdo ditë për shkak të mënyrës se si flet apo ecën.
“Për shembull, kur dal në rrugë, ata (njerëzit) fillojnë të më gjykojnë. Madje, të godasin në rrugë, të tërheqin zvarrë, të godasin me çfarëdo që të gjejnë, kështu që ky nuk është vendi i duhur. Këtu ku jetojmë të gjithë të ngacmojnë”, – tha 18-vjeçari.
Po ashtu ai i tha gazetarit tonë se nuk është i regjistruar në shkolla dhe për momentin punon për të përballuar shpenzimet.
“Ka pasur raste kur kam dashur të largohem dhe të shkoj jashtë vendit dhe kam përfunduar duke u larguar, duke menduar se do të ishte një e ardhme shumë më e mirë për mua, por ngaqë nuk ia dola, u detyrova të kthehesha. E lashë shkollën në mes”, – shtoi ai.
I riu nga Korça deklaroi se të ardhmen e tij e sheh jashtë Shqipërisë, duke parë se vetëm kështu beson se mund të gjejë mbështetje.
“Po të ishin njerëz, nuk do të gjykonin, do të na mbështesnin”, tha ai, duke shtuar se ky paragjykim dhe sulm ndaj preferencave seksuale ka detyruar shumë në qytet me të njëjtin orientim seksual si ai, të mos dalin nga frika e reagimeve të familjes dhe shoqërisë së tyre.
