Korça do të jetë mikpritësja e radhës e një ngjarjeje të veçantë kulturore: Java Kulturore Franceze do të gjallërojë qytetin nga data 14 deri më 24 qershor, duke sjellë një përvojë shumëdimensionale që bashkon artin, muzikën, kulinarinë dhe baletin bashkëkohor.
Lajmi është bërë i ditur nga Ministri i Ekonomisë, Kulturës dhe Inovacionit, Blendi Gonxhja, i cili theksoi se ky edicion i dedikuar Korçës vjen me një atmosferë të pasur festive që pasqyron trashëgiminë dhe ndikimin e gjerë të kulturës franceze.
Programi përfshin performanca muzikore live me DJ dhe artistë, ekspozita arti bashkëkohor, shfaqje baleti dhe koreografi moderne, si dhe degustime të kuzhinës franceze, duke krijuar një mozaik unik emocionesh për qytetarët dhe vizitorët.
“Ky është një takim midis traditës dhe risisë, që sjell më afër se kurrë frymën franceze dhe dialogun ndërkulturor në zemër të Korçës”, u shpreh ministri Gonxhja.
Java Kulturore Franceze është pjesë e sezonit të katërt të Javëve Kulturore Ndërkombëtare, një nismë që ka udhëtuar nëpër qytete të ndryshme të Shqipërisë duke promovuar ndërveprimin kulturor dhe pasurimin artistik.
