Nga data 14- 17 maj 2024 Universiteti “Fan S. Noli” do të organizojë Javën Studentore: “Learners Today, Inspires Tomorrow”.
Veprimtaritë e kësaj jave filluan sot me Panairin “Inspire, Educate, Innovate” në të cilin morën pjesë institucionet e pushtetit vendor të Qarkut Korçë, si dhe biznese që operojnë në rajonin tonë.
Në fjalën përshëndetëse prof. as. dr. Benita Stavre, zëvendësrektor për shkencën dhe projektet falënderoi pjesëmarrësit në panair, duke vënë theksin në këtë organizim të ndërmarrë nga UNIKO, pjesë e të cilit do të jenë takime të hapura të studentëve me Alumnit e Universitetit, me drejtues biznesi, aktorë lokalë e individë të angazhuar në komunitetin lokal, leksioni i hapur “Të bashkuar në diversitet”; promovime e takime me studentë pjesëmarrës në programet Erasmus+, promovime të rasteve të suksesit të mobiliteteve; si dhe veprimtari shoqërore dhe sportive.
Në ditën e çeljes së veprimtarive të Javës Studentore përshëndetën edhe Kryetari i Këshillit të Qarkut, Korçë, dr. Erjon Nexhipi, prefekti i Korçës, z. Nertil Jole, si dhe përfaqësuesja e Bashkisë Korçë, znj. Aida Kristo, të cilët vlerësuan rëndësinë e këtij organizimi si për studentët, ashtu edhe për bashkëpunimin e suksesshëm e të vazhdueshëm me Universitetin “Fan S. Noli”.
Gjatë panairit studentët u njohën me veprimtarinë që zhvillojnë kryesisht institucionet e pushtetit vendor, si dhe disa nga bizneset që operojnë në rajonin e Korçës, si dhe me mundësitë që ato ofrojnë për praktika profesionale e punësim.
Më pas, në fakultete vijuan takimet me përfaqësues të Alumnit të Universitetit “Fan S. Noli”, të cilët sot sjellin përvojat e tyre të suksesit si drejtues të institucioneve apo bizneseve të ndryshme.
Java Studentore do të finalizohet me organizimin e Konferencës Studentore Shkencore Multidisiplinore me temë: “Perspektiva Inovatore për Edukimin dhe Teknologjinë”.
