Prodhimi këtë vit është i kënaqshëm për fermerët e kësaj zone, por dhimbja e kokës për ta duhet të vazhdojë, pasi çmimi është gati sa gjysma e vitit të kaluar.
Sipas fermerëve, çmimi prej 25 lekësh për kilogram bën që ata të dalin me humbje apo marrin vetëm shpenzimet e tyre dhe mos shohin asnjë fitim.
“Jemi llafosur me gjithë sipërmarrësit që marrin drithin, çmimi ka shkuar më 250 lekë të vjetra. Kjo është katastrofë. Vjet ka qenë 450-500, ministrja bëri thirrje që mbillni grurë, tani gruri nuk shkon fare. Tani jemi totalisht të dështuar”,-tha fermeri Lili Mucollari.
“Po të bësh llogari me këtë çmim i bie kot sa kemi punuar. Punimet i kemi bëre me çmimet e shtrenjta, nafta, plehrat, qiraja e tokës, me 250 lekë ose merr bukën e gojës ose viri zjarrin, po nuk vlen. Del me humbje po të llogaritësh shpenzimet nuk mbulon dot kostot “,-tha Cone Veriu.
“Nuk leverdis hiç, se nuk dalin shpenzimet, as plehu kimik, as nitrati. Po ta shes me këtë çmim dal me humbje “,- tha Hysni Bego.
I revoltuar, njëri nga fermerët fajëson qeverinë për situatën në treg, duke treguar se mundësitë janë tepër të mëdha për ta lënë tokën djerrë vitin e ardhshëm.
“Ky është një problem i madh, nuk e di, qeveria nuk dha zgjidhje dhe ne fermerët, jemi të dështuar. Gjysma e çmimit i fundos gjithë fermerët. Nuk u mor asnjë masë. Rrezik që nuk do e mbjellim më. Edhe pse ligji është që duhet mbjellë se ndryshe gjobitesh, por qeveria na çon për të korrur dhe na fshen draperinjtë, ne mbjellim, ata nuk marrin prodhimin”,-tha tha fermeri Lili Mucollari.
Në fushën e Maliqit janë 4392 hektarë tokë të mbjella me grurë, 403 hektarë elb dhe 84 hektarë thekër.
