Procesi përgatitor për zgjedhjet e 11 majit po vijon normalisht në juglindje të vendit. Materialet zgjedhore kanë mbërritur tashmë në të gjitha Komisionet Zonale të Administrimit Zgjedhor (KZAZ) të qarkut të Korçës dhe janë në proces shpërndarjeje drejt qendrave të votimit.
Vetëm në Bashkinë e Korçës janë 104 qendra votimi. Kryetarja e KZAZ nr. 75 për Bashkinë Korçë, Monika Beqiri, konfirmon se të gjitha materialet po përgatiten dhe se komisionerët e qendrave të votimit janë njoftuar që t’i tërheqin në orët e para të së shtunës.
“Gjithçka po ecën sipas planifikimit. Komisionerët janë lajmëruar dhe do të paraqiten nesër në mëngjes për tërheqjen e materialeve përkatëse”, deklaroi Beqiri.
Në të njëjtën ditë do të bëhet shpërndarja e materialeve zgjedhore edhe në gjashtë KZAZ-të e tjera të qarkut të Korçës. Këto janë të vendosura në pallatet e sportit në Korçë dhe Pogradec, si dhe në palestra të shkollave të mesme në bashkitë juglindore.
Në total, qarku i Korçës ka 7 KZAZ dhe dhjetëra qendra votimi që do të pajisen me materialet e nevojshme në kohë, për të garantuar një proces zgjedhor të rregullt dhe të qetë.
