Kolonja ka çelur zyrtarisht sezonin turistik veror me një koncert festiv në qendër të qytetit të Ersekës, ku e ftuar speciale ishte këngëtarja e njohur Aurela Gaçe. Mbrëmja festive mblodhi qindra qytetarë dhe vizitorë, duke krijuar një atmosferë elektrizuese falë performancës energjike të artistes.
Kryetari i Bashkisë Kolonjë, Erion Isai, theksoi se interesi për turizmin në këtë zonë po rritet ndjeshëm, falë investimeve në infrastrukturë, promovimit të trashëgimisë kulturore dhe zhvillimit të fshatrave turistike. Vitin e kaluar, Kolonja dhe zonat përreth u vizituan nga mbi 60.000 turistë, ndërsa këtë vit pritet një fluks edhe më i lartë.
Për muajt korrik dhe gusht, Bashkia Kolonjë ka planifikuar një kalendar të pasur me aktivitete kulturore, artistike dhe festive, që synojnë të tërheqin turistë vendas dhe të huaj dhe të gjallërojnë jetën në këtë krahinë me histori dhe natyrë të veçantë.
