Gazetarja e Radio Televizionit të Korçës, Konstanca Koçi, është zgjedhur kryetare e degës së Unionit të Gazetarëve të Shqipërisë (UGSH) për qarkun e Korçës, duke sjellë një frymë të re bashkëpunimi dhe përfaqësimi për komunitetin e gazetarëve në këtë rajon.
Në të njëjtin proces zgjedhor, gazetari Xhensil Shkëmbi është votuar koordinator i degës, ndërsa është formuar edhe një bord drejtues me tre anëtarë që do të mbështesë punën e strukturave lokale të UGSH.
Takimi u ndoq nga kreu i Unionit të Gazetarëve Shqiptarë, gazetari dhe analisti i njohur Aleksandër Çipa, i cili monitoroi procesin dhe mbajti një fjalë përshëndetëse. Ai foli mbi sfidat me të cilat përballet sot media dhe punonjësit e saj në Shqipëri, duke theksuar domosdoshmërinë e përmirësimit të kushteve të punës, të drejtave të gazetarëve si dhe rritjen e bashkëpunimit në rrjete rajonale dhe ndërkombëtare. Çipa e konsideroi gjendjen sociale, çështjen e pagave dhe të sigurimeve shoqërore të gazetarëve si një “skandal të heshtur” që vazhdon të mbetet problematik në realitetin mediatik të vendit.
Konstanca Koçi, e cila ka një karrierë të gjatë e të suksesshme në median audiovizive, merr tashmë drejtimin e degës së UGSH-së në Korçë, si një profesioniste e respektuar dhe e përkushtuar, e cila pritet të luajë një rol të rëndësishëm në mbrojtjen e të drejtave të gazetarëve dhe forcimin e bashkëpunimit mes tyre.
Zgjedhja e saj si kryetare u bë me votë unanime nga gazetarët pjesëmarrës, duke e konsideruar Koçin një përfaqësuese të denjë të Unionit të Gazetarëve Shqiptarë, organizatë që prej gati dy dekadash është një prej zërave kryesorë në mbrojtjen e të drejtave të gazetarëve në vend.
