Prej tre vitesh, organizata Korça Alpin po bën një punë të palodhur në mbrojtje të mjedisit, duke mbjellë qindra fidanë në kuadër të nismës “Sot 1 fidan, nesër 1 pyll”. Një nga projektet më të dukshme të kësaj nisme është pylli linear përgjatë rrugës “Çlirimi i Korçës”, që shtrihet nga varrezat e Mborjes deri tek Kisha e Shën Thanasit.
Megjithatë, temperaturat e larta dhe thatësira e kësaj vere kanë vënë në rrezik mbijetesën e shumë prej këtyre fidanëve. Për këtë arsye, Korça Alpin ka bërë një thirrje të hapur për ndihmën e qytetarëve në dy drejtime: sigurimin e bidonëve plastikë prej 5 litrash (ose më të mëdhenj) dhe pjesëmarrjen fizike në aksionin e ujitjes që do të zhvillohet ditën e premte, më 11 korrik, nga ora 18:00 deri në 20:00.
Organizatorët kanë njoftuar se ujitja do të bëhet rrënjë më rrënjë, me metodën e thjeshtë të mbushjes së ujit në burim dhe vaditjes direkte të pemëve. Për të lehtësuar orientimin e vullnetarëve, pemët që janë në gjendje më të rëndë për shkak të mungesës së ujit do të jenë të shënuara me një shirit të kuq rreth trungut. Korça Alpin apelon që të paktën këtyre fidanëve t’u hidhet ujë, qoftë edhe një pagure e vogël, për t’ua shpëtuar jetën.
Bidonët mund të dorëzohen çdo ditë, nga ora 10:00 deri në 14:00, pranë zyrave të Dorcas Aid International Albania dhe Korça Alpin. Për më shumë informacion, qytetarët mund të kontaktojnë në numrin +355692555212.
Bashkohuni edhe ju kësaj nisme për një mjedis më të gjelbër dhe një jetë më të shëndetshme në qytetin e Korçës!
