Në Skemën Kombëtare të Subvencioneve gjatë vitit 2024, janë mbështetur 67,133 fermerë në të gjithë vendin me një fond total prej 5.2 miliardë lekësh.
Qarku i Fierit kryeson me numrin më të lartë të përfituesve, pasuar nga Qarku i Korçës, duke theksuar traditën bujqësore dhe angazhimin për zhvillimin e qëndrueshëm të sektorit në këto zona.
Petraq Lena është një blegtor nga fshati Vithkuq i Korçës, i cili tregon se ka përfituar nga skemat kombëtare të mbështetjes në bujqësi gjatë tre viteve të fundit, por ai thotë se mbështetja financiare në këto skema duhet të jetë edhe më e madhe, në mënyrë që fermerët të kenë mundësi të zhvillojnë më shumë fermat e tyre.
Sipas burimeve nga Agjencia për Zhvillim Bujqësor dhe Rural në qarkun e Korçës gjatë vitit të kaluar janë mbështetur 12098 fermerë në të gjitha skemat kombëtare të ofruara nga qeveria, ndërsa më shumë se 10 mijë prej tyre mësohet të kenë marrë mbështetje në skemën e naftës.
