Në një mbrëmje festive dhe emocionuese, Korça kremtoi dje 15-vjetorin e krijimit të Fondacionit Shqiptaro-Amerikan për Zhvillim, ngjarje që u zhvillua në zemër të Pazarit të Vjetër, një zonë simbol e transformimit të jashtëzakonshëm që ka pësuar qyteti ndër vite. Ky fondacion ka luajtur një rol kyç në mbështetjen e projekteve të bashkisë, duke kontribuar në përmirësimin e infrastrukturës dhe kulturës, çka e ka kthyer Korçën ndër qytetet më të vizituara në çdo stinë të vitit.
Deputeti i Korçës, Niko Peleshi, në fjalën e tij përshëndetëse, vlerësoi mbështetjen e vazhdueshme të Fondacionit në projekte kyçe për qytetin, duke theksuar rëndësinë e përfshirjes së fondacionit edhe në projekte të ardhshme, siç është ristrukturimi dhe zhvillimi i Universitetit të Korçës. “Synimi ynë është që ky universitet të kthehet në një institucion model në rajon,” u shpreh Peleshi, duke nënvizuar rolin kyç të Fondacionit në arritjen e këtij qëllimi.
Mbrëmja u pasurua me performanca të shkëlqyera nga grupi Ritfolk, Anxhela Peristeri dhe Bledi Polena, duke krijuar një atmosferë festive që shënoi këtë jubile të rëndësishëm për qytetin dhe fondacionin.
