Pas fluksit të lartë gjatë ditëve të festave të fundvitit, qyteti i Korçës i është kthyer normalitetit. Emigrantët, pas pushimeve me familjet e tyre, kanë nisur kthimin drejt vendeve të punës, ndërsa edhe turistët që vizituan zonën e Juglindjes po largohen gradualisht.
Kjo ka sjellë një stabilizim të qarkullimit në qytet, duke ulur ndjeshëm trafikun që ishte evident gjatë fundvitit. Megjithatë, për të garantuar sigurinë dhe mbarëvajtjen në rrugë, policia rrugore mbetet e pranishme në të gjitha rrethrrotullimet dhe akset kryesore të qytetit.
Autoritetet vijojnë të monitorojnë situatën, ndërsa pritet që qarkullimi të mbetet i qetë në ditët në vijim. Festat e fundvitit u shoqëruan me një rritje të ndjeshme të vizitorëve në Korçë, duke përforcuar edhe një herë rëndësinë e qytetit si një destinacion turistik në Shqipëri.
