Me hidhërim të thellë njoftojmë ndarjen nga jeta të Dr. Nikollaq Gurllari, më datën 30 Tetor 2023, pas një sëmundje të rëndë.
Dr. NIKOLLAQ ILO GURLLARI (POLENA)
Ka lindur në qytetin e Korçës më 27. 09. 1947.
Rrjedh nga një familje me origjinë shoqërore puntore. Familja e tij ka ndihmuar luftën dhe shtëpia e tyre ka qenë bazë e Luftës Nacional- Çlirimtare.
Shkollën 7-vjeçare dhe atë të mesme i kreu në qytetin e lindjes me rezultate shumë të mira (viti 1954-1965). Studimet e larta i kreu në Universitetin Shtetëror të Tiranës.
E drejta e studimit i doli për në Fakultetin e Inxhinierisë Mekanike, por për këtë nuk ishte i kënaqur. Duke dëgjuar bisedat e gjyshes dhe nënës së tij, se si ai kishte lindur në shtëpi pa asistencë mjekësore dhe respektin për bluzat e bardha (mjekët dhe infermierët që i dukeshin njerëz të jashtëzakonshëm) i kishte lindur dëshira që të bëhej mjek.
Pas shumë përpjekjesh, arriti të plotësojë dëshirën duke e ndërruar degën me një student tjetër.
Studimet i kreu në Fakultetin e Mjekësisë në Tiranë, në vitet 1965-1970 dhe mbas kësaj, u specializua për Obstetrikë-Gjinekologji pranë Spitalit Obstetrik- Gjinekologjik Tiranë 1971-1973. Pas specializimit, filloi punën si mjek obstetër-gjinekolog në Shtëpinë e Lindjes.
Korçë (janar 1974), ku mjekët që punonin aty, si: Gaqo Pulluqi, Luiza Kole e Fredi Themeli e mirëpritën, e ndihmuan dhe respektuan vazhdimisht.
Shkonte rregullisht në Qendrën Shëndetësore të Lozhanit çdo muaj për vizita dhe ngritjen tekniko- profesionale të mamive të zonës.
Po ashtu, kryente vizita obstetrikale e gjinekologjike në Ndërmarrjen e Qilimeve, ku punonin me qindra gra deri në vitin kur kjo u mbyll.
Për shumë vite kreu edhe detyrën e Inspektorit Sanitar Shtetëror për Maternitetin duke kërkuar me rigorozitet zbatimin e rregullave.
Me ndarjen e pavioneve, më 1981, u caktua Shef i Repartit të Lindjeve, detyrë që me disa shkëputje e kreu 25 vjet: 1981-1992 dhe 1999-2012.
Në vitin 1979 ka kryer kurs kualifikimi në Spitalin Ushtarak në specialitetin “Kirurgjia e luftës”. Për shumë vite ka dhënë mësim si mësues i jashtëm në shkollat e ulta dhe të mesme mjekësore të qytetit të Korçës dhe, që prej vitit 2002 e në vazhdim, pedagog i jashtëm në Departa- mentin e Infermierisë të Universitetit “Fan S. Noli” dhe ka hartuar dispencën “Urgjencat obstetrikale (material për studentët).
Zotëronte gjuhën ruse.Punonte për ngritjen tekniko-profesionale dhe kbotuar në revistat mjekësore shumë artikuj të vlerësuar për problemet që përcillnin.
Urdhëri i Mjekut, Qarku Korçë, i shpreh ngushëllime të sinqerta familjes.
