Forcat e rendit në Korçë kanë goditur një rrjet të trafikut të emigrantëve, duke arrestuar një 40-vjeçar nga qyteti, i cili po transportonte një emigrant të paligjshëm drejt Italisë.
Sipas informacioneve zyrtare, në një operacion të koordinuar mes Seksionit për Hetimin e Trafiqeve të Paligjshme dhe Forcës së Posaçme Operacionale të DVP Korçë, u bë i mundur arrestimi i shtetasit B.M., banues në Korçë. Ky i fundit u kap pranë fshatit Boboshticë duke drejtuar një automjet tip “Nissan” në të cilin ndodhej një emigrant nga Egjipti, i cili pagoi 600 euro për këtë transport.
Hetimet zbuluan se 40-vjeçari operonte me kujdes, duke marrë vetëm një person në secilën rrugë për të shmangur kapjen nga policia.
Gjatë kontrollit u sekuestruan automjeti, një shumë parash dhe dy telefona celularë. Rasti i është referuar Prokurorisë së Korçës për hetime të mëtejshme.
