Në zbatim të urdhrit të Ministrisë së Bujqësisë dhe Zhvillimit Rural, Bashkia e Korçës ka ndërmarrë masa të forta parandaluese për të frenuar përhapjen e sëmundjes së rrezikshme të Murtajës së Ruminantëve të Vegjël.
Si pjesë e këtyre masave, ndalohet rreptësisht qarkullimi i bagëtive të imta, si dhe dalja e tyre në Tregun e Gjësë së Gjallë. Po ashtu, është ndaluar kalimi i kafshëve nga një tufë në tjetrën, për të shmangur çdo rrezik përhapjeje të infeksionit.
Policia Bashkiake dhe strukturat përgjegjëse janë në terren në bashkëpunim të ngushtë me shërbimin veterinar rajonal për të mbikëqyrur zbatimin e këtyre rregullave.
Autoritetet u bëjnë thirrje të gjithë fermerëve që të tregojnë kujdes maksimal, të ndjekin udhëzimet dhe të kontaktojnë menjëherë veterinerin nëse vërejnë simptoma të sëmundjes te kafshët.
Këto masa mbrojtëse janë thelbësore për ruajtjen e shëndetit të tufave dhe për sigurinë bujqësore në gjithë territorin e bashkisë.
