Drejtoria Vendore e Policisë Korçë ka finalizuar disa operacione dhe procedime penale për vepra të ndryshme penale, të ndodhura në qytetet e Korçës dhe Pogradecit.
Specialistët për Hetimin e Narkotikëve arrestuan në flagrancë shtetasin N. K., 32 vjeç, si dhe nisën procedim penal ndaj shtetasit O. H., 21 vjeç, banues në Pogradec. Gjatë kontrolleve fizike dhe në banesat përkatëse, u gjet dhe u sekuestrua një sasi lënde narkotike e dyshuar si cannabis sativa.
Ndërkohë, specialistët për Hetimin e Krimeve në Komisariatin e Policisë Korçë arrestuan në flagrancë shtetasin R. I., 22 vjeç, si dhe filluan procedim penal ndaj R. Sh., 23 vjeç. Sipas informacioneve, shtetasi R. Sh. ka kanosur me thikë një 22-vjeçar, për motive të dobëta, ndërsa R. I. rezultoi se kishte thyer masën e sigurisë “Arrest në shtëpi”, të vendosur nga Gjykata e Korçës.
Po ashtu, u referuan materialet në Prokurori për shtetasit E. B., 44 vjeç dhe A. B., 41 vjeç, të dy banues në Korçë, të cilët dyshohet se kanë goditur me pëllëmbë një 15-vjeçar, për motive të dobëta.
Specialistët e Qarkullimit Rrugor referuan gjithashtu materialet për fillimin e procedimit penal ndaj një 17-vjeçari, i cili u kap duke drejtuar një automjet pa leje drejtimi.
Të gjitha materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
