Drejtoria Vendore e Policisë Korçë ka njoftuar një sërë veprimesh procedurale, arrestimesh dhe shpallje në kërkim, të kryera gjatë orëve të fundit në disa bashki të qarkut.
Specialistët për Hetimin e Krimeve Ekonomike dhe Financiare kanë referuar materialet në Prokurori, ku ka nisur procedimi penal ndaj H. K., 27 vjeç, banues në Bilisht, i dyshuar se ka përvetësuar një shumë parash përmes mashtrimit ndaj disa shtetasve; si edhe ndaj L. Xh., 48 vjeç, banues në Librazhd, i cili ushtronte aktivitetin e transportit të udhëtarëve nga Greqia, pa dokumentacionin e nevojshëm.
Ndërkohë, specialistët e Qarkullimit Rrugor kanë arrestuar në flagrancë B. Xh., 38 vjeç, banues në Korçë, i kapur duke drejtuar një automjet pa leje drejtimi.
Shërbimet e Komisariatit të Policisë Maliq kanë referuar materialet në Prokurori për nisjen e procedimit penal ndaj N. P., 37 vjeç, banues në Podgorie, i dyshuar se ka kanosur një 49-vjeçar me një vegël pune (lopatë); si edhe ndaj O. A., 49 vjeç, banues në Libonik, i dyshuar për vjedhje të disa pajisjeve makinash në një biznes lokal.
Në Devoll, policia ka referuar materialet dhe ka shpallur në kërkim A. B., 50 vjeç, banues në Kapshticë, pasi ka ushtruar dhunë fizike ndaj bashkëshortes, e cila është pajisur me urdhër mbrojtjeje.
Nga Komisariati i Policisë Pogradec është regjistruar kallëzimi i K. O., 69 vjeç, banues në fshatin Gurras, i cili ka njoftuar se gjatë mungesës së tij në banesë, persona të paidentifikuar i kanë dëmtuar derën dhe i kanë vjedhur para dhe dokumente. Po vijojnë hetimet për identifikimin dhe kapjen e autorëve.
Të gjitha materialet procedurale i janë referuar Prokurorisë së Korçës, për veprime të mëtejshme ligjore.
