Policia vijon veprimet procedurale dhe kërkimet në disa zona të qarkut, ku gjatë 24 orëve të fundit janë evidentuar disa raste që kanë kërkuar ndërhyrje të menjëhershme të strukturave lokale.
Në Pogradec, shërbimet e Komisariatit kanë referuar në Prokurori materialet për fillimin e procedimit penal ndaj dy shtetasve.
Shtetasi M. H., 33 vjeç, banues në fshatin Alarup, dyshohet se ka goditur me send të fortë shtetasin D. H., ndërsa Xh. Ç., 26 vjeç, banues në Stropckë, është kapur duke transportuar sasi drush zjarri pa dokumentacionin përkatës. Lënda drusore u sekuestrua në cilësinë e provës materiale.
Në Devoll, mbrëmjen e datës 11 dhjetor, familjarët e shtetasit T. L., 78 vjeç, banues në Bilisht dhe me probleme të shëndetit mendor, kanë njoftuar Policinë për largimin e tij nga banesa. Pas kërkimeve të intensifikuara, ai u lokalizua nga shërbimet e Policisë Kufitare Kapshticë dhe ato të Komisariatit Devoll, në afërsi të fshatit Trestenik. I moshuari u gjet në gjendje të mirë shëndetësore dhe iu dorëzua familjarëve.
Ndërkohë në Maliq, një 59-vjeçare ka kallëzuar në Komisariat se babai i saj, N. P., 89 vjeç, është larguar nga banesa në fshatin Vreshtas. Policia ka nisur menjëherë kërkimet dhe po punon për gjetjen e të moshuarit.
Materialet e rasteve të evidentuara i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme procedurale.
