Ky sezon pritet të sjellë një rritje prej 10% të rezervimeve nga turistët e huaj në Korçë, krahasuar me vitin e kaluar. Sipas operatorëve turistikë, rezervimet kanë filluar që vitin e kaluar dhe po shfaqin një interes të lartë për qytetin e Korçës.
Kristiano Koçibelli, administrator i një hoteli në qytetin e Korçës, tha se për vitin 2025 rezervimet me turistë të huaj kanë filluar këtë muaj dhe do të mbyllen në janarin e vitit të ardhshëm.
Kristiano Koçibelli:
“Këtë vit kemi parë një interes të shtuar nga turistët e huaj, veçanërisht nga vendet europiane dhe aziatike. Ky është një sinjal pozitiv për turizmin në Korçë.”
Ndryshe nga vitet e kaluara, këtë vit krahas turistëve europianë, kanë rezervuar edhe turistët aziatikë, të cilët gjatë vitit 2024 kanë ardhur për herë të parë në juglindje të Shqipërisë përmes grupeve të organizuara.
Kristiano Koçibelli:
“Turistët aziatikë kanë shfaqur interes të madh për kulturën dhe traditat e qytetit tonë, duke u bërë pjesë aktive e jetës turistike në Korçë.”
Nga ana tjetër, Eriketa Koçollari, menaxhere në një hotel në juglindje të vendit, tha se inteligjenca artificiale këtë vit ka luajtur një rol kyç në menaxhimin e rezervimeve dhe përmirësimin e shërbimit ndaj klientëve.
Eriketa Koçollari:
“Inteligjenca artificiale na ka ndihmuar të kontrollojmë disponibilitetin në kohë reale dhe të koordinojmë rezervimet nga platforma të ndryshme pa gabime apo vonesa. Kjo teknologji ka sjellë një ndryshim të madh, duke optimizuar punën dhe duke ofruar një përvojë më të mirë për turistët e huaj.”
Një vit më parë, 85% e turistëve që kanë vizituar Korçën kanë qenë turistë të huaj. Ky sukses është rezultat i kontratave që operatorët turistikë kanë lidhur me agjenci të huaja, duke e bërë Korçën një destinacion gjithnjë e më të preferuar për turistët ndërkombëtarë.
