Presidenti i FIFA-s, Gianni Infantino, ka thirrur një mbledhje urgjente me drejtuesit më të lartë të qeverisë botërore të futbollit këtë të mërkurë në Rabat të Marokut, në përpjekje për të menaxhuar krizën e shkaktuar nga plani i tij i tërhequr për shitjen e operacioneve tregtare dhe eventeve të institucionit.
Infantino, i cili ndodhet në Marok prej një jave, po përballet me kritika të ashpra për projektin e propozuar “FIFA Forward Enterprise”. Sipas mediave, në këtë takim ekzekutiv do të marrin pjesë sekretari i përgjithshëm Mattias Grafstrom dhe anëtarë të bordit drejtues, përfshirë drejtorin financiar Thomas Peyer, drejtorin ligjor Emilio Garcia Silvero, shefin e kabinetit Daniel O’Toole, drejtorin për federatat anëtare Elkhan Mammadov dhe drejtorin e marrëdhënieve me median Bryan Swanson.
Kundërshtimet nga figurat e larta të futbollit
Plani i Infantinos ka hasur në rezistencë të fortë nga brenda institucionit. Drejtori i zhvillimit global të futbollit, Arsene Wenger, sekretari i përgjithshëm Mattias Grafstrom dhe presidenti i Federatës Jordaneze të Futbollit, Princi Ali, kanë shprehur qartë kundërshtimin e tyre ndaj projektit. Grafstrom, përmes një emaili të brendshëm drejtuar stafit të FIFA-s, e cilësoi javën e fundit si “një seri ngjarjesh të trishta dhe të dënueshme”.
Nga ana tjetër, Princi Ali akuzoi FIFA-n se kishte krijuar një situatë që “i ngjan shantazhit”, duke iu referuar drejtpërdrejt çështjes së shpërblimeve të papaguara dhe mbështetjes për rizgjedhjen e Infantinos në krye të qeverisë së futbollit.
Qëndrimi i Arsene Wenger dhe paralajmërimi i UEFA-s
Arsene Wenger, i cili mban postin e drejtorit të zhvillimit global që prej vitit 2019 dhe merret me analizën e të dhënave, programet online të trajnimit dhe garat e të rinjve, kërkoi transparencë të plotë. Ish-trajneri i Arsenalit, i cili më parë kishte mbështetur propozimin e Infantinos për zhvillimin e Kupës së Botës për meshkuj çdo dy vjet, publikoi një deklaratë zyrtare përmes FIFA-s për të sqaruar pozicionin e tij.
“Ngjarjet e fundit në FIFA kërkojnë disa sqarime nga ana ime. Unë nuk kam qenë i përfshirë në këtë plan strategjik dhe jam njohur me projektin për herë të parë përmes raportimeve në media. Vendimi për ta tërhequr projektin ishte absolutisht i domosdoshëm dhe i padiskutueshëm, sepse besoj fort në një FIFA të pavarur që i shërben futbollit me përkushtim, transparencë dhe integritet”, theksohet në deklaratën e Wenger.
Situata është rënduar më tej pas ndërhyrjes së UEFA-s, e cila ka paralajmëruar veprime ligjore ndaj FIFA-s. Wenger është një nga 18 zyrtarët e përmendur në një kërkesë të UEFA-s për ruajtjen e dokumenteve. Deri më tani, i vetmi zyrtar që ka dhënë dorëheqjen për shkak të këtij skandali është Carlos Cordeiro, këshilltar i lartë i Infantinos për strategjinë globale dhe qeverisjen. Gjatë largimit të tij, Cordeiro e cilësoi propozimin si “një marrëveshje të keqe për futbollin”, duke shtuar me shqetësim se ai “do të vinte peng të ardhmen e futbollit”.
Foto: Euronews Albania
