Mjeku i nderuar Kujtim Gora është ndër të pakët mjek profesionistë i cili ende, edhe pse në moshë të thyer sot, vazhdon të jetë ndihmë për mijëra banorë të gjithë zonës së Maliqit. Asnjë nuk u largua nga kjo zonë. Jo se nuk e kishte mundësinë, por dashurinë për këtë vend e kishte të madhe
“Më pëlqen të shëroj njerëzit e zonës time, më pëlqej të marr uratat e tyre, është një gëzim i veçantë kur i njeh njerëzit me emër dhe mbiemër dhe atë gjest ata nuk ta harrojnë kurrë. Mbase njeriu ka lindur për t’u ndierë mirë” – i thotë ai Kolibri.al.
Doktor Kujtimi, siç i thërrasin dhe banorët, është një nga mjekët i cili është vlerësuar edhe nga Bashkia e Maliqit si qytetar nderi por vlerësimi më i madh për të është diçka tjetër.
“Nuk ka vlerësim më të madh të ecësh lirshëm në qytet dhe të marrësh përshëndetjet e banorëve. Nuk ka vlerë një karton në mur sesa vlera e fjalëve të mira nga njerëzit përreth. Nuk jam egoist por më pëlqen të jem i nderuar nga njerëzit e thjeshtë sesa ata të rëndësishmit e qytetit. Unë gjithë jetën jam rrethuar nga njerëz të thjeshtë. Ka patur raste kur kam kuruar tre breza të një familje. Nuk ka vlerësim më të madh, të të besojnë”.
Kujtim Gora është mjeku që shëron me gjilpërë e me gojë, një doktor i personalizuar i banorëve thotë ai duke qeshur, sepse ashtu, thjeshtë, larg vëmendjes, larg mediave, larg popullaritetit, ai ka krijuar një imazh të tillë, të një doktori që mund ta telefonosh në cilëndo orë, e ai do të jetë aty, edhe në shtëpinë e të sëmurit, sepse ka ende fuqi e vullnet të shërojë. Të shërojë më shumë sesa një sëmundje, të shërojë një mentalitet…
