Në korrik të këtij viti u mbushën plot 2 vite që është ndarë nga jeta mjeku humanist korçar Kujtim Shabani.
Ishte 12 korrik 2021 kur zemra e tij do të ndalte vrapin si pasojë e një ataku kardiak, teksa mjeku ishte duke pushuar me familjen e tij në Radhimë. Lajmi u përhap shpejt asokohe, ashtu si tronditja në opinionin publik korçar por edhe në radhët e bluzave të bardha ishte e rëndë.
Mjeku, babai, kolegu nuk nuk do paraqitej si çdo ditë në derën e urgjencës së spitalit të Korçës, aty ku pati ndihmuar me mijra e mijra pacientë, iu kish dhënë ndihmën e parë dhe iu kish shpëtuar jetën në qindra raste.
Por Kujtimi nuk arriti dot të shpëtonte zemrën e tij të madhe, ishte aq i mirë saqë Zoti e deshi pranë vetes. Edhe sot e kësaj dite emri i tij, ashtu siç e kishte, Kujtim, është skalitur fort në kujtesën e çdo korçari, pacienti e kolegu. Të gjithë e kujtojnë me mall pasionin e tij për punën, buzëqeshjen dhe qetësinë që e karakterizonte.
Pas vdekjes së tij, e merituar do të ishte edhe vlerësimi që Bashkia e Korçës ndërmori për ta shpallur “Qytetar Nderi” bashkë me shumë kolegë , të afërm dhe miq të tij.
1 vit pas vdekjes së tij pikërisht më 12 Korrik 2022, Këshilli Bashkiak i Korçës i jep titullin “Qytetar Nderi” pas vdekjes, mjekut të njohur korçar Kujtim Shabani. Titulli iu dorëzua familjes se tij, asokohe nga kryetari i Këshillit Bashkiak Erion Nexhipi në një ceremoni të zhvilluar në hollin e shërbimit të Urgjencës, në Spitalin Rajonal të Korçës, atje ku mjeku Kujtim Shabani shërbeu për vite me radhë si shef i këtij shërbimi.
Ish-shefi i urgjencës, ishte mjeku humanist, ai që më së shumti gjatë kësaj periudhe të pandemisë iu ndodh qytetarëve korçarë në çdo orar, jo vetëm në urgjencë por edhe në vizita familjare.
Si Kujtimi vështirë se do ketë të dytë. Thonë që njerëz të tillë lindin një herë në 100 vjet dhe Kujtimi është ndër ta.
