Çdo korçar e njeh Spartak Kasulin, piktorin prej 32 vitesh që nuk e donte jetën jashtë shtetit por pikërisht në qytetin e tij.
Në këto 32 vite karriere, Kasuli ka një sërë punimesh në telajo, mjaft të veçanta, që të tërheqin aq shumë kur i sheh në albume dhe ato pak që i kanë mbetur në studio. Gjatë intervistës, u bëmë kurioz për ta pyetur për pikturën e tij të preferuar. Kush ishte ajo? Dhe pse vijon të mbetet në koleksionin personal të piktorit, me premtimin se nuk do ta heqë kurrë nga studio!
“Në karrierën time artistike kam rreth 240 punime, për momentin kam vetëm 37 prej tyre që i mbaj në studio. Për një piktor, punimet janë si gishtat e dorës, dhe si fëmijët, nuk mund t’i ndaj dot.
Nga të gjitha punimet do të veçoja një pikturë që ka ardhur thjesht spontanisht, dhe është e vetmja që s’mundem ta heq nga studio. Tematika e saj është “Tirana në shi”, një moment që nuk e kisha gjetur gjatë gjithë karrierës time, dhe që s’mund ta përsërit më në mënyrë aq të bukur në telajo.
Lidhur me historinë e kësaj pikture, atë ditë kam qenë në Tiranë, prisja një mikun tim përballë një dyqani, isha tepër i lodhur dhe binte shumë shi. Muzgu po binte dhe mendoja që kisha gjithë atë rrugë për të bërë, ndërsa shikoja njerëz që bëheshin gati për të shkuar në shtëpi, dikush priste autobusin, dikush taksinë.
Ndërkohë që unë u ndjeva pak xheloz që kisha shumë rrugë për të bërë, dëshirë e cila më ngeli si ndjesi dhe e pikturova.” – tregon Kasuli.
Korça është një dashuri më vete! Një qytet aq i bukur sa mban vlera e tradita të veçanta.
“Që ta hedhësh Korçën në telajo është e lehtë, por si do ta hedhësh është ajo që ka rëndësi. Sepse Korça nëse e fillon në një këndvështrim, do detyrohesh të vendosësh edhe 10 këndvështrime të tjera dhe sado që të pikturosh të duket sikur ke bërë pak.
Vetë Korça është një pikturë, të sjell një dëshirë të merresh me art, dhe e quaj me fat që jemi korçarë dhe që transmetojmë vlerat e kulturën e qytetit tonë brenda dhe jashtë vendit.” – shprehet piktori
