Në kuadër të fushatës për zgjedhjet e 11 majit, kandidati i Partisë Socialiste, Ilirian Pendavinji, zhvilloi një vizitë në qytetin e Leskovikut, ku u prit me entuziazëm nga banorët dhe strukturat lokale të partisë.
Gjatë takimit në sheshin kryesor të qytetit, Pendavinji theksoi se: “kudo që shkojmë, ndjejmë dashurinë dhe mbështetjen e qytetarëve, por edhe përgjegjësinë për t’u bërë zëri i tyre në Parlament”.
Në fjalën e tij, kandidati përmendi projektet e planifikuara për Leskovikun, veçanërisht investimet në infrastrukturë dhe zhvillimin rural, që sipas tij, “do të sjellin punësim dhe standarde më të larta jetese për familjet që jetojnë jashtë zonave urbane”. Ai nënvizoi nevojën për vazhdimësi politike në krye të vendit, duke argumentuar se “vetëm me stabilitet dhe një vizion të qartë mund të arrijmë integrimin e plotë europian të Shqipërisë”.
“Ndryshimi i vërtetë ndodh vetëm kur votojmë me zemër dhe mendje për vendin që duam”, deklaroi Pendavinji, duke bërë thirrje për një pjesëmarrje masive në votime. Ai kujtoi qytetarët se vota e tyre është forca vendimtare për të përcaktuar rrugën e Shqipërisë drejt një të ardhmeje të begatë dhe të sigurt.
Kundrejt sfidave dhe përpjekjeve të shumta, kandidati i Partisë Socialiste u shpreh i bindur se “sot nuk ka alternativë më të mirë se Partia Socialiste” për të çuar përpara zhvillimin e vendit.
