Liceu Francez i Korçës, një nga institucionet më simbolike të arsimit shqiptar, po hyn në një epokë të re 108 vite pas themelimit të tij. Lajmin e ka bërë të ditur Kryetari i Kuvendit, Niko Peleshi, përmes një postimi ku thekson vlerën historike dhe vizionin bashkëkohor të këtij institucioni arsimor.
Sipas Peleshit, Liceu Francez ka qenë ndër vite jo vetëm një shkollë ku mësoheshin lëndë akademike, por një vatër ku u formuan mendje të lira, karaktere të forta dhe një frymë europiane që ka ndikuar ndjeshëm në jetën kulturore, akademike dhe shoqërore të vendit. Brenda mureve të tij u kultivua gjuha frënge krahas shqipes dhe u ndërtua vizioni për një Shqipëri më të emancipuar dhe qytetare.
Sot, kjo trashëgimi historike po rilind me hapjen e Liceut Franko-Shqiptar të Shkencave dhe Inovacionit, një shkollë publike ekselence që do të ofrojë njëkohësisht diplomë franceze dhe maturë shtetërore shqiptare. Institucioni do të funksionojë me pedagogë shqiptarë dhe francezë, laboratorë modernë, bibliotekë, platforma digjitale, si dhe infrastrukturë mbështetëse si konvikt dhe mensë.
Ka nisur tashmë përgatitja e brezit të parë të nxënësve, ndërsa ky investim cilësohet si strategjik për të rinjtë e Korçës dhe mbarë vendit, duke forcuar lidhjet e Shqipërisë me hapësirën frankofone dhe atë europiane.
“Korça ka qenë gjithmonë një hap përpara dhe Liceu i saj po e dëshmon sërish”, shprehet Peleshi, duke e cilësuar këtë projekt si një urë të re drejt Europës dhe së ardhmes për brezat e rinj.
