Është gjeneruar ekstrakti i dytë i listave të zgjedhësve për zgjedhjet parlamentare të 11 majit. Në krahasim me ekstraktin e parë janë rreth 1500 votues më pak për qytetin e Korçës për shkak të regjistrimeve të emigrantëve në platformën PER.
Punonjësit e gjendjes civile janë duke kryer afishimin e listave të reja me ndryshimet përkatëse në mënyrë që të gjithë qytetarët e interesuar të kenë mundësi të verifikojnë emrat në lista.
“Në të gjithë bashkinë e Korçës aktualisht janë më shumë se 110 mijë zgjedhës nga të cilët 74 359 në qytetin e Korçës, ndërsa 104 qendra votimi janë në qytetin e Korçës. Të gjithë qytetarët që kanë të drejtë vote mund të verifikojnë emrin në listat zgjedhore të afishuara pranë bashkisë apo njësive administrative por një gjë të tillë mund ta bëjnë edhe në portalin e-albania, në faqen e KQZ-së, apo edhe në faqen zyrtare të Ministrisë së Brendshme”- ka thënë Jurgen Qirici, Përgjegjës i Zyrës së Gjendjes Civile Bashkia Korçë
Numri i votuesve pritet të ndryshojë në vazhdim për shkak të regjistrimit të votuesve të diasporës, të cilët do të vijojnë të hiqen nga listat e afishuara aktualisht.
Gjithashtu janë edhe 180 persona me moshë 100 vjeç, të cilët në rast se nuk paraqesin kërkesë për të votuar do të bllokohen nga sistemi dhe nuk do të kenë të drejtë vote.
