Kryetari i Partisë Demokratike, Lulzim Basha i është rikthyer turit të takimeve me qytetarët në të gjithë vendin.
Paraditen e sotme, Basha zhvilloi takim me banorë të zonës buzë liqenit të Pogradecit. Ai postoi pamje nga takimi në rrjetet sociale.
Kreu demokrat ishte sot në disa zona të Pogradecit ku do të zhvillojë takime e biseda me qytetarë e sipërmarrës, në kuadër të turit të tij në të gjithë Shqipërinë.
Basha takon familjen e Filip Petre
Kryetari i PD, Lulzim Basha, gjatë ndalesës së tij në Lin, vizitoi familjen e Filip Petre, familje që ka vuajtur përndjekjen dhe ndëshkimin nga diktatura komuniste.
Sipas Bashës, në mënyrë që e shkuara të mos harrohet dhe shërimi i plagëve ende të hapura të regjimit komunist të jetë përfundimtar, kemi detyrën të shlyejmë borxhin moral dhe material ndaj të përndjekurve dhe pasardhësve të tyre.
“Sot në Lin, pata kënaqësinë e veçantë të vizitoja familjen e Filip Petre, i përndjekur politik. Bashkëbiseduam për problemet dhe harresën me të cilën kjo shtresë e shoqërisë është përballur ndër vite, paçka se sakrificat e tyre dhe familjarëve të tyre kanë merituar dhe meritojnë mirënjohjen dhe nderimin më të lartë nga të gjithë ne. Që e shkuara të mos harrohet dhe shërimi i plagëve ende të hapura të regjimit komunist të jetë përfundimtar, kemi detyrën të shlyejmë borxhin moral dhe material ndaj të përndjekurve dhe pasardhësve të tyre”, shkroi Basha në rrjetet sociale.
Kryetari i PD, Lulzim Basha pas takimeve në Lin shkroi në rrjetet sociale se Shqipëria ka nevojë për ndryshim për ta bërë jetën e shqiptarëve më të mirë, për të hapur vende të reja pune, për t’u dhënë të rinjve tanë një të ardhme më të mirë këtu në vendin tonë të mrekullueshëm.
“Kënaqësi të takoja dhe bisedoja me banorë të fshatit të bukur të Linit. I dëgjova me vëmendje shqetësimet dhe problemet e tyre. Sot, të ardhurat e shumicës së shqiptarëve janë më të ulëtat në Europë, sepse fatkeqësisht korrupsioni në Shqipëri është në nivelet më të larta. Shqipëria ka nevojë për ndryshim për ta bërë jetën e shqiptarëve më të mirë, për të hapur vende të reja pune, për t’u dhënë të rinjve tanë një të ardhme më të mirë këtu në vendin tonë të mrekullueshëm”, u shpreh ai
Por, Shqipëria e standardeve europiane bie ndesh me ambiciet e politikës së vjetër që do të sundojë për vete, dhe jo të qeverisë për njerëzit. Kjo politikë e vjetër po e mban peng vendin. Shqipëria ka një potencial të jashtëzakonshëm, dhe ne duhet ta shndërrojmë atë në të mirë të qytetarëve dhe jo të një grupi njerëzish të lidhur me pushtetarët”, u shpreh Basha.
