Një 26-vjeçar nga fshati Pirg i Maliqit është arrestuar nga Policia, pasi akuzohet për ndezjen e qëllimshme të një zjarri që shkaktoi djegien e një sipërfaqeje me bimësi dhe shkurre. Ngjarja ka ndodhur më 30 korrik 2025, rreth orës 15:00, në vendin e njohur si “Arat e Sulës”, mbi fshatin Leminot.
Sipas hetimeve paraprake të kryera nga specialistët për Hetimin e Krimeve të Komisariatit të Policisë Maliq, i riu me inicialet G. A., kishte ndezur zjarr me qëllim hapjen e kullotave të reja. Si pasojë e përhapjes së flakëve nga era, zjarri ka dalë jashtë kontrollit, duke përfshirë një sipërfaqe të konsiderueshme toke.
I dyshuari është arrestuar në flagrancë, ndërsa materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme ligjore.
Drejtoria Vendore e Policisë Korçë u bën thirrje të gjithë qytetarëve të shmangin zjarrvënien në hapësira të hapura, pasi kjo veprimtari e rrezikshme do të përballet me masa të rrepta ligjore. Çdo rast zjarri apo paligjshmërie mund të raportohet në numrin falas 112, duke garantuar reagim të menjëhershëm dhe anonim.
