Këshilli Bashkiak i Maliqit miraton raportin e monitorimit të buxhetit për katërmujorin e parë të 2025
Në mbledhjen e fundit të Këshillit Bashkiak të Maliqit është miratuar raporti i monitorimit të buxhetit për katërmujorin e parë të vitit 2025. Sipas këtij raporti, buxheti është realizuar në masën 40%, një tregues që kërkon përmirësim në muajt në vijim, siç u theksua edhe nga kryetari i bashkisë, Gëzim Topçiu.
Kryebashkiaku prezantoi një pasqyrë të realizimeve buxhetore gjatë kësaj periudhe, duke nënvizuar se administrimi më efikas i fondeve do të jetë prioritet për pjesën tjetër të vitit.
Gjatë mbledhjes u miratua gjithashtu një ndryshim në disa zëra të buxhetit për vitin 2025. Falë kursimeve të krijuara nga prokurimet publike, është vendosur që këto fonde të shfrytëzohen për sistemimin e varrezave në pesë fshatra të bashkisë: Podgorie, Sovjan, Pojan, Zëmblak dhe Vloçisht.
Ky vendim synon përmirësimin e infrastrukturës komunitare dhe garantimin e kushteve më të mira për shërbimet publike në zonat rurale. Këshilli Bashkiak dhe administrata vendore shprehen të angazhuar për një menaxhim sa më të përgjegjshëm dhe efikas të buxhetit gjatë gjithë vitit.
