Në Maliq ka vende pune, por qytetarët zgjedhin të mos punojnë me arsyetimin se pagat nuk janë të larta.
Bashkia e Maliqit është një prej bashkive me numrin më të lartë të qytetarëve që trajtohen me ndihmë ekonomike, në raport kjo me numrin e popullsisë, çka tregon për nivel e ulët të të punësuarve në këtë bashki.
Kohët e fundit situata është duke ndryshuar për shkak edhe të disa bizneseve private të cilat ofrojnë vende pune për qytetarët por sërish kanë vështirësi në rekrutimin e tyre.
Kryebashkiaku Gëzim Topçiu thotë se për të gjithë familjet e papuna që janë në skemën e ndihmës ekonomike dhe refuzojnë punën e ofruar do t’iu hiqet kjo ndihmë.
Edhe qytetarët e konfirmojnë faktin se nuk mungojnë vendet e punës, por e lidhin mospranimin e tyre nga njerëzit me nivelin e pagës aq sa thonë se zgjedhin të ikin në Greqi sezonalisht sesa të punojnë në Maliq.
2500 familje në bashkinë e Maliqit trajtohen me ndihmë ekonomike nga sistemi i ndihmës ekonomike, çka tregon se krahu i punës nuk mungon, por mungon dëshira për të punuar.
