Në një ceremoni të vogël me miq dhe të afërm të mësuesit Skënder Belishta, Bashkia Maliq i jep titullin “Krenaria e qytetit”, me motivacion “Për kontribut të veçantë profesional e publik në edukimin kulturor dhe profesional të brezit të ri, si mësimdhënës, drejtues model, simbol i fisnikërisë dhe bashkëjetesës në komunitet”.
Ka qenë vajza e tij ajo që ka marrë medalien e krenarisë dhe përzemërsisht ka falenderuar Këshillin bashkiak dhe Bashkinë Maliq për vlerësimin që është bërë ndaj babait të saj dhe familjes.
Skënder Belishta lini më 04.12.1932 në fshatin Beras të rrethit të Korçës, në një familje të shquar arsimdashëse dhe me tradita të lashta e të spikatura patriotike dhe liridashëse. Veprimtaria patriotike do e rrëmbente në një moshë fare të re, 12-13 vjeçare, duke dalluar për guximin dhe trimërinë e shpalosur në detyrat që i ngarkoheshin.
Ka kryer shkollën e lartë për gjuhë shqipe dhe të huaj (rusisht) me rezultate të shkëlqyera, duke punuar më pas në profesionine arsimtarit për gati 40 vjet me radhë.
Gjithashtu gjatë këtyre viteve ka kryer funksionin e drejtuesit në arsim, si drejtues dhe kryedrejtues shkollash.
Ai ka lënë gjurmë në fushën e arsimit ndaj si rrjedhojë është dekoruar me urdhërin “Naim Frashëri” nga Presidenti i Kuvendit Popullor të Shqipërisë me motivacionin “Për punë të mirë e të palodhur në organet e pushtetit vendor për disa legjislatura”.
Gjithashtu ka punuar si publicist duke shkruar në gazeta dhe revista si: Zëri i popullit”, Përpara”, Mësuesi” “Gora”, “Kushtrim Brezash”, në revistën “Nëntori” dhe në revistën “Pedagogjike”.
Në kohën kur ka punuar si këshilltar, ai me palodhshmërinë e tij trajtonte dhe zgjidhte problemet e punësimit, shkollimit dhe strehimit, duke edukuar mirësinë e kulturës siç i ka hije një gorari.
Skënderi mbetet një mësues karriere dhe intelektual i nderuar për kontributet si njeri dhe vizionar për shoqërinë. Portrete si ai, i bëjnë nder jo vetëm krahinës së Gorës dhe komunitetit ku ai punoi dhe jetoi.
Për njerëz të rrallë si ai ka nevojë shoqëria, ndaj meritojnë të jenë personalitete të shquara për kontributin që i kanë falur brezave. Koha mbetet gjykuesja më e mirë për të gjithë ne. Figura si Skënder Belishta vënë një tullë në murin e lartë të idealizmit shoqëror.
