Skënderbeu po kalon një periudhë mjaft të vështirë, ndërsa fitorja mungon prej dhjetë ndeshjesh. Më shumë se një fazë ka kaluar, qëkur bardhekuqtë mposhtën Bylisin në transfertë.
Aktualisht janë korçarët që mbyllin renditjen e Superiores. Vetëm 15 pikë në 19 javë janë pak, ndërsa viti 2025 duhet të sjellë përforcime në skuadër për mbijetesën.
Skënderbeu gjithsesi e ka një model për të ndjekur dhe nuk është larg. Në edicionin 2020/21, pas 19 javësh bardhekuqtë ndodheshin në vendin e fundit me 12 pikë.
Atë sezon e mbyllën në vendin e shtatë duke shpëtuar nga rënia. Apolonia dhe Bylis prenë asokohe biletën për në Kategorinë e Parë.
Rënia nga kategoria si në vitin 2022 është sigurisht dhe frika më e madhe për 8 herë kampionët. Kështu Ernest Gjoka me skuadrën kanë një mision mjaft të vështirë, ndërsa gara për mbijetesën është mjaft e fortë.
