Mëngjes i hidhur në Pogradec
Një grua rreth të 60-ave, me disa pako kartopeceta në dorë që i ofronte dhe shiste për 20 lek te reja. Afrohet tek unë. Përshtypje nuk më bënë ato çka shiste sesa një pako bosh ilaçesh.
Pse e mban këtë pakon bosh të ilaçeve në dorë?
-Ta shohin njerëzit përse punoj, mbase u vjen keq dhe m’i blejnë
Sa duhet të shesësh për të blerë ilaçet?
-15 pako kartopeceta.
Po sot sa ke shitur?
-Asnjë!
Për çfarë është ky ilaçi?
-Diabet, kam vite e sëmurë.
Nuk duhet t’i marrësh falas?
-Duhet po kush te jep këtu falas, përveç sëmundjes?
Sa kushton ilaçi?
-335 lek.
I jap lek për dy pako ilaçe dhe i them që sot të shkonte shtëpi.
-Jo jo, do shes.
Po pse?
-Po pasnesër, a do dalësh këtu prap ti? Kush mi jep ilaçet, apo të vdes?
Të të prishet terezia, kur sheh një nënë, në rrugë, për 335 lek ilaçe – ndërkohë që lexon në TV se u vodhën miliona euro në tenderat e shëndetësisë e se zyrtarëve u janë gjetur miliona euro shkelje e abuzime.
Të zë mallkimi i kësaj nëne…
(foto e postuar me leje)
