Ministrja e Arsimit, Mirela Kumbaro, zhvilloi një vizitë zyrtare në shkollën “Raqi Qirinxhi” në Korçë, një nga institucionet më të hershme dhe më prestigjioze arsimore të qytetit, që mban gjallë traditën e liceut francez dhe njëherazi shndërrohet në një hapësirë bashkëkohore të dijes dhe inovacionit.
Gjatë vizitës, ministrja u njoh nga afër me programin rigoroz arsimor që kjo shkollë ofron, në të cilin ndërthuret cilësia në mësimdhënie me seksionin dygjuhësh në gjuhën frënge. Shkolla, falë përkushtimit, pasionit dhe përvojës së trupës pedagogjike, ofron jo vetëm formim akademik cilësor, por edhe mundësi të ndryshme zhvillimi për talentet e nxënësve në art, sport, zeje, teknologji dhe inovacion.
“Raqi Qirinxhi” vlerësohet si një model i integrimit të programit mësimor me aktivitetet jashtëshkollore, duke nxitur kreativitetin dhe zhvillimin e aftësive të shumëfishta. Atmosfera arsimore harmonizohet me dimensionin estetik dhe kulturor të Korçës, duke reflektuar origjinalitetin dhe shpirtin e ndryshimit.
Ministrja Kumbaro vlerësoi rihapjen e Liceut Franko-Shqiptar si një pikë të re reference për arsimin në Korçë, që do të zgjerojë ofertën arsimore dhe do të forcojë më tej lidhjet kulturore e gjuhësore me Francën.
“Korça ka një traditë të jashtëzakonshme në arsim dhe ‘Raqi Qirinxhi’ është shembull i gjallë i kësaj trashëgimie, duke treguar se si historia mund të bashkëjetojë natyrshëm me inovacionin”, u shpreh ministrja gjatë vizitës.
Vizita u shoqërua nga drejtues lokalë të arsimit, pedagogë dhe nxënës të cilët prezantuan një sërë projektesh edukative dhe krijuese, duke dëshmuar se shkolla vazhdon të jetë një nga shtyllat më të forta të zhvillimit të arsimit në juglindje të vendit.
