Estela dhe Kristiana ish-studente të Universitetit “Fan S. Noli” sot, dy infermiere të përkushtuara e të suksesshme në kujdesin paliativ, Korçë!
Falë pasionit, punës e përkushtimit vajzat kanë arritur suksesin e dëshiruar në profesionin e tyre si infermiere, duke u angazhuar në kujdesin paliativ – një fushë e ndërlikuar dhe e ndjeshme, ku përkushtimi dhe ndihma emocionale janë po aq të rëndësishme sa kujdesi mjekësor.
Pas përfundimit të studimeve në Universitetin tonë, Estela dhe Kristiana u angazhuan në një prej fushave më delikate të shëndetësisë siç është kujdesi për pacientët që përballen me sëmundje terminale. Përvoja e tyre në punë ka qenë transformuese, jo vetëm për pacientët që kanë ndihmuar, por edhe për to si profesioniste të shëndetit dhe si individë.
Çdo ditë në punën e tyre, ato përballen me sfida që kërkojnë jo vetëm aftësi të shkëlqyera teorike, por punë sistematike dhe për më tepër një ndjeshmëri të thellë për të kuptuar dhimbjen dhe emocionet e pacientëve dhe familjeve të tyre, duke u bërë edhe një shembull frymëzimi për të gjithë të rinjtë që dëshirojnë të ndjekin karrierën në fushën e shëndetësisë.
Ndërkohë, në kuadër të tetorit rozë, muajit të ndërgjegjësimit për kancerin e gjirit, vajzat gjenë rastin të përcjellin edhe një mesazh ndërgjegjësimi për gratë dhe vajzat: “Kujdesi ndaj shëndetit është prioritet për të gjithë. Për këtë arsye, kontrolli dhe parandalimi janë “armët” më të fuqishme që kemi në duart tona”! përcillet mesazhi.
