Ashtu si çdo vit, në ditën e shënuar të Kurban Bajramit, Myftinia e Korçës u bë qendër e vizitave dhe urimeve nga besimtarë të shumtë dhe përfaqësues të institucioneve vendore.
Myftiu i Korçës, Ledian Cikalleshi, priti gjatë gjithë ditës vizitorët, të cilët shprehën urimet e tyre për festën dhe përcollën mesazhe paqeje, dashurie dhe harmonie ndërnjerëzore. Në këtë atmosferë festive, përveç qytetarëve, në ambientet e Myftinisë u paraqitën edhe figura të njohura të jetës publike.
Në mesin e vizitorëve ishin Kryetari i Bashkisë Korçë Sotiraq Filo, përfaqësues të Këshillit të Qarkut, Prefekturës, deputetë të zonës, përfaqësues të partive politike, si dhe krerë të komuniteteve të tjera fetare.
Të gjithë së bashku ndanë urime dhe dëshira për më shumë solidaritet, mirëkuptim dhe bashkëjetesë në shoqëri, duke nënvizuar vlerat që mbart kjo festë e rëndësishme për besimtarët myslimanë.
Festa e Kurban Bajramit mbetet një moment reflektimi dhe afrimi mes njerëzve, një ditë që thekson rëndësinë e sakrificës, ndarjes dhe ndihmës për të tjerët, sidomos për ata në nevojë.
