Rudina Dervishi, gazetarja dhe drejtuesja e njohur prej shumë vitesh e emisionit televiziv “Ditari” të Zërit të Amerikës, u nda nga jeta këtë martën, në moshën 53-vjeçare.
Shkak i ndarjes së parkohshme nga jeta të gazetares është bërë një sëmëndje e rëndë, ku pas një beteje dy vjeçare ajo e humbi më 12 shtator luftën kundër kancerit të gjirit.
Lajmi është bërë me dije nga Zëri i Amerikës përmes një postimi në facebook, ku ka ndarë dhe disa pamje nga puna e gazetares së njohur ndër vite.
“Ikja e saj e parakohshme, është një humbje e madhe për familjen dhe për kolegët e saj të Shërbimit Shqip të Zërit të Amerikës.
Për më shumë se 25 vjet, Rudina dha një kontribut të çmuar me profesionalizmin e saj si një gazetare e apasionuar, duke mbuluar tema të shumëllojshme nga ekonomia, politika, të drejtat e njeriut dhe të gruas, e deri tek arti.
Ne, kolegët e saj të Zërit të Amerikës, do ta mbajmë mend Rudinën për mprehtësinë, dinamikën, humorin dhe përkushtimin e saj. Ajo la pas bashkëshortin, tre djemtë dhe nënën”, shkruan VOA në mbishkrimin e videos.
