Qytetarët kanë kohë deri më 31 mars për të dorëzuar deklaratën individuale të të ardhurave (DIVA) për vitin 2024, pas ndryshimeve të fundit në legjislacionin tatimor. Ndryshe nga vitet e kaluara, kur afati për dorëzim ishte 30 prilli, këtë vit ai është shtrënguar për një muaj më herët.
Të gjithë individët që kanë realizuar mbi 1.2 milionë lekë të ardhura në vit, nga 2 milionë që ishte më parë, janë të detyruar të plotësojnë deklaratën. Kjo përfshin edhe personat që kanë të ardhura mbi 100 mijë lekë bruto në muaj nga paga, si dhe të gjithë të dy punësuarit, pavarësisht nivelit të pagës.
Gjithashtu, individët që kanë përfituar mbi 50 mijë lekë në vit nga burime të tjera, për të cilat nuk është mbajtur tatimi në burim, duhet gjithashtu të deklarojnë të ardhurat e tyre.
Administrata Tatimore ka sqaruar se deklarata DIVA 2024 do të gjenerohet automatikisht e paraplotësuar me të dhënat mbi të ardhurat bruto nga pagat dhe shpërblimet nga marrëdhëniet e punës. Parashikohet që me uljen e pragut të të ardhurave të deklarueshme, numri i deklaruesve këtë vit të arrijë mbi 144 mijë individë. Këto ndryshime synojnë të formalizojnë tregun e punës dhe të rrisin kontrollin mbi qarkullimin e parasë.
