Në Qilarin e Verës “Naço”, një kantinë artizanale e denjë për muze
Në një nga shtëpitë karakteristike pogradecare, në shtëpinë e Vaso Naços, në brendinë e qilarëve të saj bëhet verë prej shtatë brezash.
Butet të cilët, mbushen dhe hapen prej dekadash, janë prodhuar në Itali në vitet 1930.
Distiluesi, i ruajtur mjaft mirë, mban vulën e Shoqërisë “Deroy Fils Aîné” dhe është prodhuar në Paris në vitet 1900.
Ndërsa në matësit e sheqerit, mbi 100 vjeçarë, shkruhet “Mostimetro Babo di Klosterneuburg” për nder të enologut austriak Wilhelm von Babo (1827-1894).
Ajo që është më interesante, mbi bute trashëgohet edhe sot një zakon i kahershëm i quajtur “Bukë e qepë dhe verë në shtëpi!”.
Sipas rrëfenjës thuhet se në Pogradec çdo familje arrinte të bënte një but verë. Edhe ata që nuk kishin mundësi dhe nuk kishin vreshta, shkonin dhe punonin në vreshtat e atyre që ishin në gjëndje më të mirë. Në fund të ditës nuk merrnin para por koshat me rrush për të bërë verë.
Si simbol i prodhimit të verës së butit, pogradeci prej 27 vitesh organizon Festën e Verërave, e cila është edhe një garë për të shpallur verën më të mirë artizanale të prodhuar nga poradecarët. Edhe pse më të pakta në numër në lagjet e vjetra të Pogradecit sot është e vështirë të gjesh një familje që nuk shtie rrush për verë në but.
