Ditën e sotme Niko Peleshi ka qenë në qytetin e Korçës, ku ka marrë pjesë në konstituimin e kryetarit të bashkisë dhe këshillit bashkiak të Korçës. Pas mbarimit të procedurës ai është pyetur në lidhje me situatën e tensionuar të Kosovës dhe Serbisë.
Ministri i Mbrojtjes Niko Peleshi nga Korça ka bërë me dije se Kosova dhe Bosnjë-Hercegovina janë dy vende të brishta në Ballkanin Perëndimor, ndërkohë që Shqipëria, Mali i Zi dhe Maqedonia e Veriut duke qenë pjesë e NATO-s janë shumë më të sigurta.
Zoti Peleshi edhe njëherë tjetër shikon si rrugën e vetme të zgjidhjes, mes Kosovës dhe Serbisë, rrugën e dialogut.
Nga ana tjetër Peleshi i ka kërkuar palës serbe lirimin e menjëhershëm të 3 policëve kosovarë, ndërkohë që ka shtuar se nuk duhet të ketë parakushte për të shkuar drejt tavolinës së dialogut.
