Reportazhin e rradhës vendosëm që t’ia dedikonim një të riu korçar, që njihet jo pak nga artdashësit e qytetit të kulturës e traditës.
Bëhet fjalë për Arjol Pepin, 33 vjeçari i cili nëpërmjet artit të tij po sjell një risi për këtë qytet dhe po frymëzon të rinjtë gjimnazistë. Arjoli prej 5 vitesh është mësues i lëndës së arteve në shkollën e mesme “Raqi Qirinxhi”, por kontributi që po jep për këtë shkollë dhe nxënësit e saj, e tejkalon të zakonshmen që jemi mësuar të shohim.
Këtë profesion ai nuk e sheh thjesht si një punë, por e konsideron një mision që duhet t’i bëjë nxënësit e tij të komunikojnë me një botë tjetër brenda vetes së tyre. Duke parë mungesën e aktiviteteve dhe ekspozitave jo vetëm në Korçë por edhe në Shqipëri, duket se figurat e njohura të artit thjesht njihen si emra nga të rinjtë e sotëm, pak prej tyre mund të kenë njohuri të plota për ta.
Lënda e artit është e vetmja që mund t’i afrojë ata me qindra e mijëra punime të famshme të autorëve nga e gjithë bota.
Ndërkohë që, misioni tjetër i Arjolit është të pikasë nxënësit e talentuar, të cilët mund të gjenden në çdo shkollë, jo vetëm tek gjimnazi që ai ushtron profesionin momentalisht. E gjithë çështja sipas tij qëndron tek fakti se duhet të evidentohet talenti e më e rëndësishme pas saj, të punosh për t’a shfaqur këtë talent në mënyrën më të mirë të mundshme.
Talentin e tij Arjoli e ka treguar në gjërat e bukura e të veçanta që ai ka bërë që prej kthimit të tij nga kryeqyteti pasi përfundoi studimet në Akademinë e Arteve, talent të cilin e tregon edhe sot e kësaj dite me një risi që ka sjellë për qytetin e Korçës. Ai e ka kthyer gjimnazin ku punon në një shkollë arti, ndonëse parimisht ky institucion nuk është i tillë.
Të gjithë do pyesnim çfarë ka bërë ky mësues me nxënësit e tij që e veçon nga të gjitha shkollat e tjera të qytetit?
Shiheni foton:
Në pamje të parë do të mendonim se është një bibliotekë me libra dhe disa banka të vendosura mes saj, por nëse shohim me vëmendje, e dallojmë qartë që ajo bibliotekë është e pikturuar në mur në stilin 3D. Për qytetin e Korçës këto kanë qënë të parat që janë realizuar nga një piktor, me qëllimin e vetëm për të promovuar sa më shumë artin dhe për të afruar më tepër të rinjtë drejt tij.
Me keqardhje, Arjoli shprehet se viteve të fundit nuk po i jepet shumë rëndësi konkurseve që dikur bëheshin së tepërmi në gjithë vendin, konkurse të cilat do të nxirrnin në pah talentet e rinj, do të risillnin vullnetin për të pikturuar një botë ndryshe nga ajo që jetojmë, dhe do t’u falnin kënaqësi jo vetëm artdashësve por edhe banorëve që rrallë herë mund të jenë ndeshur me të tilla punime.
Ndërsa e pyesim nëse ka menduar të krijojë ekspozita së bashku me nxënësit, ai na tregon se deri më tani kanë zhvilluar tre prej tyre, me tematika të ndryshme por ajo çka bie në sy tek këto ekspozita janë pikërisht pikturat që nxënësve u është dashur shumë kohë e durim deri në realizim, dhe duket se ja kanë dalë mrekullisht t’a shfaqin talentin në këto punime të vështira duke u kujdesur deri në detaj.
E nuk na mbetet gjë tjetër veçse të presim çeljen e ekspozitës e ndërkohë të shohim në galerinë më poshtë punimet murale të realizuara nga piktori Arjol Pepi së bashku me nxënësit e shkollës “Raqi Qirinxhi”.
