Operatorët turistikë në Korçë kanë nisur të përdorin inteligjencën artificiale (IA) për të menaxhuar dhe optimizuar shërbimet e tyre, duke sjellë një përmirësim të dukshëm në funksionimin e përditshëm. Teknologjia e re ka lehtësuar ndjeshëm proceset e rezervimeve, komunikimin me klientët dhe promovimin e destinacioneve turistike.
Eriketa Koçollari, menaxhere hoteli, tregon se fillimisht e nisi përdorimin e inteligjencës artificiale si një provë, por rezultatet ishin të suksesshme. Ajo thekson rëndësinë e trajnimeve për të rritur më tej efikasitetin dhe për të ofruar një shërbim më të avancuar.
“Fillimisht ishte një test, por shumë shpejt e kuptuam se inteligjenca artificiale na ndihmoi të përmirësojmë organizimin dhe komunikimin me klientët. Trajnimet janë të nevojshme për të shfrytëzuar sa më mirë mundësitë që ofron kjo teknologji,” – shprehet Koçollari.
Aktualisht, disa biznese turistike në Korçë po eksperimentojnë me zgjidhje të bazuara në IA, duke e konsideruar atë një mjet të domosdoshëm për të rritur efikasitetin dhe për të përmirësuar përvojën e turistëve.
