Aksi rrugor Korçë-Pogradec vazhdon të jetë një aks i rrezikshëm për drejtuesit e mjeteve.
Ditën e djeshme kanë ndodhur dy aksidente, njëri në fshatin Zvirinë, ku drejtuesi i automjetit përplasi keq këmbësorin dhe tjetri në fshatin Çiflig ku drejtuesi i mjetit ishte pa patentë, përplas një automjet tjetër dhe largohet nga vendngjarja, arrestohet nga Policia pak më vonë.
Ja çfarë ka deklaruar Policia;
DVP Korçë/Vihen në pranga 2 shtetas për vepra të ndryshme penale.
- Në vijim të informacionit paraprak të dhënë mbrëmjen e ndjeshme, për një aksident rrugor ju informojmë se specialistët e Trafikut Urban dhe Interurban të DVP Korçë, arrestuan në flagrancë shtetasin A. T., 58 vjeç, banues në Maliq, pasi ky shtetas në aksin rrugor “Korçë-Pogradec”, në afërsi të fshatit Zvirinë, Maliq, duke drejtuar automjetin tip “Opel ATP”, ka aksidentuar këmbësorin Th. K., 58 vjeç, banues në Zvirinë, i cili ndodhet në spitalin e Korçës, në gjendje të rëndë shëndetësore.
- Po këta specialistë arrestuan në flagrancë shtetasin E. L., 28 vjeç, banues në fshatin Çiflig, Korçë, pasi në afërsi të këtij fshati, duke drejtuar automjetin tip “Toyota”, është përplasur me automjetin tip “Porsche” me drejtues shtetasin Th. V. Si pasojë e përplasjes, u dëmtua lehtë pasagjerja e automjetit tip “Toyota”, shtetasja L. B., 19 vjeçe, banuese në Libonik, Maliq. Shtetasi E. L., pas përplasjes u largua nga vendi i aksidentit, por u kap dhe ndalua nga shërbimet e Policisë. Nga verifikimi i kryer rezultoi se 28-vjeçari e drejtonte automjetin, pa leje drejtimi.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
